Հիմնանորոգված ընթերցասրահ՝ «Իզմիրլյան» հիմնադրամի նվերը ԵՊՀ-ին
Հոկտեմբերի 1-ին հիմնանորոգումից հետո բացվել է Երեւանի պետական համալսարանի Սարգիս եւ Մարի Իզմիրլյանների անվան գրադարանի ընթերցասրահներից մեկը։
Հոկտեմբերի 1-ին հիմնանորոգումից հետո բացվել է Երեւանի պետական համալսարանի Սարգիս եւ Մարի Իզմիրլյանների անվան գրադարանի ընթերցասրահներից մեկը։
Բանասիրական գիտությունների գրականության ընթերցասրահի հիմնանորոգումը «Իզմիրլյան» հիմնադրամի նվերն է ԵՊՀ 100-ամյակին։ Իզմիրլյան ընտանիքը պետհամալսարանին աջակցում է 1994-ից, երբ բացվեց գրադարանի նորակառույց մասնաշենքը։
Մոտ 400 քմ տարածքն ամբողջությամբ նորոգվել է, թարմացվել, էլեկտրոնային համակարգերով պահախցեր են տեղադրվել։ Վերանորոգումն իրականացրել է հիմնադրամը, կահույքը ձեռք են բերել համալսարանի միջոցներով։
«Ամենակարեւորը՝ այս սրահ մտել է օդափոխություն, կարող ենք ունենալ մեր ուզած ջերմաստիճանը։ Դա գրադարանի ամենակարեւոր խնդիրներից էր։
Կահույքն ամբողջությամբ փոխվել է, քննարկումների համար ապակիներով առանձնացված 3 հատված ունենք։ Շատ կարեւոր է, որ սանհանգույցները նախատեսված են նաեւ հաշմանդամություն ունեցող մարդկանց համար»,- ասում է գրադարանի տնօրենը։
Պետհամալսարանի գրադարանը 16 հազար ընթերցող ունի։ Միջավայրի փոփոխությունը մեծացրել է նրանց հոսքը։ Նորոգված ընթերցասրահն օրական 3-4 հարյուր ընթերցողի է սպասարկում։
«Ընթերցասրահի հիմնանորոգումից հետո այնքան մարդ եկավ պարապելու, որ էլ տեղ չկար, անգամ աշխատողների աթոռներն էին վերցրել։ Միջանցքում իրար վրա դրված սեղաններ կային, որ դեռ չէինք հասցրել տեղավորել, տեսնեմ դրանք իջեցրել, աթոռները դրել շուրջն ու նստած պարապում են»,- պատմում է գրադարանի տնօրեն Եզնիկ Միրզոյանը։
«Վերանորոգումն, անշուշտ, իր կարեւոր ազդեցությունը թողեց, որովհետեւ ե՛ւ հարմարավետությունը, ե՛ւ հետաքրքրությունը, ե՛ւ փոփոխությունը տրամադրում են ուսանողներին։ Եթե առաջ գալիս էին միայն ընթերցելու, հիմա քննական շրջան է, հարմարավետ միջավայրում նաեւ պարապում են։ Առանձնացված սենյակներն էլ իրենց դերն ունեն, ուսանողները կարողանում են քննարկումներ անել, նույնիսկ ապակու վրա գրելու հնարավորությունն իր էֆեկտն ունի»,- ասում է գրադարանավար Արմենուհի Սարգսյանը։
Կանոնանդրության համաձայն՝ գրադարանից կարող են օգտվել միայն ԵՊՀ ուսանողներն ու պրոֆեսորադասախոսական կազմը։ Բայց տնօրինությունը ընթերցասրահից օգտվելու հնարավորություն տալիս է նաեւ այլ բուհերի ուսանողներին՝ ուսանողական տոմսերով։
«Գրադարանի միջավայրը, էսթետիկ կողմը շատ կարեւոր է, տրամադրող։ Ես նախընտրում եմ դասերս ընթերցասրահում անել, որովհետեւ տանը չես կարողանում կենտրոնանալ։ Իսկ էստեղ միջավայրը խթանում է սովորելուն, պարապելուն»,- ասում է ԵՊՀ Աշխարհագրության եւ երկրաբանության ֆակուլտետի ուսանողուհի Մերի Դաբաղյանը։
Պետհամալսարանի գրադարանը եւս երեք ընթերցասրահ ունի։ Երբ հնարավորություն լինի, կնորոգեն ճշգրիտ գիտությունների ընթերցասրահը, որն այս պահին ամենաշատն ունի բարեկարգման կարիք։